1st Khartoum Game Jam

قبل فتره شاركتا في مسابقة وحابي اشاركم قصتي فيها لانها كانت تجربه من التجارب السمحه والما بتجي كتير

(Khartoum Game Jam تجربة)

المقال طويل شوية ف الما مهتم في الالعاب ما يتعب نفسو يقرا

في يوم 23 يوليو صحيت الصباح لقيت وصلني ايميل من مسابقة ومكتوب فيهو مبروك لقد تم اختيارك للمنافسة فيما قد يكون أروع حدث على الإطلاق . لقد تم قبول طلبك للمشاركة في حدث

Khartoum Game Jam

وطلبو مني اني ااكد مشاركتي في المسابقة عن طريق الرد علي الايميل طبعا انا مستغرب دا شنو وانا متين قدمتا هنا ههههه لانو الفتره طولت شويه والزول نسي انو قدم كيف وبقيت بفتشف في الفيس اتذكرتا انو يوم 1 يوليو اني قدمتا في المسابقه عن طريق بوست حق مؤسسة جوتة الثقافية الالمانية وصلني من الشليق

Musab Ismail

هو مشير البوست وما قدم فيهو بي عزر انو نتو كعب عليكم الله دا عزر المهم قريت البوست وتميتو لي النهاية

وعجبتني فكرة المسابقة شديد كان وقلت دي فرصة الزول يطلع من طور الشغل شوية والضغط الحاصل ويفرق عن نفسو شوية علي الاقل .. ذيادة علي انو من زمان وانا صغير كان نفسي اعمل لعبه وتكون صناعه سودانيه وتوصل تراثنا وفهمنا لي بره بس من دخلت الجامعة انجرفتا شويه مع الحاصل وبعدتا عن الالعاب كان .. ودي ممكن تكون فرصة فمن غير تردد من شوفتا البوست وقريت الشروط وحيحصل شنو قمتا طوالي قدمتا فيها ومليت الفورمه وحكيت ظروف وقلتا اني مبرمج لكن ما حصل برمجتا لعبه وقالو لي قدم نموذج لي العاب عملتها قبل كدا وخليتا فاضيه ههههههه وانتهيت من التقديم وانا ما عارف اي شي عن المسابقة دي وهل حيقبلوني ولا لا وكيف حاعمل اللعبه دي اذا قبلوني ومن وين ابدا مع انو الالعاب ممكن تكون قريبه لي مجالي كمهندس برمجيات بس مختلفه شويه في البرمجه حقتها وتركيبا وعايزة صبر وكان مرت الايام لحدي ما جاني الايميل داك وانا ناسي

المهم لمن قريت الاميل كان فرحتا شديد انو اتقبلتا في المسابقة لكن في نفس الوقت جاتني صدمة و اتذكرتا انو انا ما بعرف شي عن صناعة الالعاب غير المحركين

unity و unreal

البيعملوهم بيها لانو قبل كدا حاولتا اشتغل بيهم ايام الجامعه لكن ما اتوفقتا نظرا لي معلوماتي الضغيفة الزمن داك فقمتا رديت علي الايميل بي اني مشارك باذن الله واستفسرتا اذا كان في مبيت ولا لا علي اساس انو الزول يستفيد من زمنو بدل يرجع البيت وقالو لي نعم يوجد امكانية للمبيت .. طوالي في نفس اليوم مشيت علي المكتب ونزلتا

unity

اشان اشوفو وافهمو بعد كم يوم بالظبط جاني ايميل تاني محتواهو “بمبادرة كريمة من مؤسسة جوتة الثقافية والسيد جوناس زيمر من معمل كولونيا للألعاب بجامعة كولونيا الألمانية، ستقام ورشة مكثفة لبرمجة الألعاب استعداداً للحدث، بتقديم من السيد زيمر.” ياخ حبيتم حب لانها جاتني في جرح وقالو الورشة حتستمر 3 يوم ورسلو لي الجدول حاولتا جاهد اي احضرم بس ما اتوفقتا فحضرتا يوم واحد اتعرفتا فيهو علي

Mr. Jonas Zimmer

وباقي الشباب ولقيتم شغالين حاجات متقدمه شويه ولقيتم

Already

بدو في العاب وقاعدين يطبقو في مفاهيم معينه فما استفدتا كتير لكن دا برضو كان تحدي اشان الزول يتعلم اكتر حكيت ليهم عن نفسي وانا قدمتا في المسابقه دي وانا مبتدئ وعرضتا فكره لعبه بسيطه اشان اعملا معاهم في الورشه وكدا لحدي نهاية اليوم وطلعتا رجعتا شركتنا المهم عدت ايام الورش وجا يوم المسابقة الصباح الموافق الخميس يوم 2 اغسطس المسابقة كانت في برج الاتصالات الطابق ال24 كان يفترض اصل بدري اشان احضر الافتتاح لكن اتاخرتا ووصلت زي الساعه 12 ظهر اول ما وصلتا طربيزة الاستقبال عملتا

check

علي اسمي لقيتو مكتوب غلط هههه طلعتا الاسانصير ووصلتا الطابق ال ٢٤ وجيت خاشي مكان المسابقة السمحه ادوني فلاش 32 قيقا فيهو

Tools و Tutorials

ياخ في احلي من كدا وقعتا علي ورقة بتنص علي انو ممكن يصوروني اثناء الحدث واني مفروض اوافق علي انو يشيرو الصور دي وكدا وادوني

Badge

مكتوب فيها اسمي الغلط هههههه كاتبني عمر بدل عمرو المهم وانا خاشي علي مكان المسابقة ما شاء الله كمية من الشباب المفعم بي الحيوية والطاقة قريب الخمسين .. منهم المبرمجين والمصممين وال

ِAnimators

وفي الفاتحين لابطوباتم والبيتعارفو وبيتناقشو عن الالعاب والبرمجة والتصميم وفي الزول العندو خلفيه معينه ولغات برمجه مختلفة والناس الخبره في المجال والناس المبتدئين ..

الحته دي ممكن تكون الجنه لي بعض الناس البعرفم ههههه

.. طبعا الناس كلهم غرباء وصعب تعرف الناس الكويسين منو في حاجه معينه اشان تكون معاهم فريق قوي ودا زاتو جزو من التحدي فقمتا مشيت علي الشباب ولقيت بعضهم بدو يكونو في الفرق حقتهم وعملتا تشبيك كدا قلتا اتعرف علي الناس قابلتا بعض الشباب الكانو في الورشة القبل المسابقة وسلمتا عليهم واثناء ما حايم لقيت

Shaikh Diya

برلومي واقف ضحكتا وسلمتا عليهو وقلتا ليهو انت برضو مشارك وكدا وطوالي كونا فريق انا وهو والاتنين مبرمجين وبدينا رحلة البحث عن مصمم اشان يصمم لينا

artworksال

الحنحتاج ليها اثناء ال

development

كل ما نمشي لي زول نلقاهو مبرمج في النهاية لقينا شباب واقفين كدا سلمنا عليهم واتعارفنا وسالناهم اذا كان كونو فرق ولا لسه ولمن قلنا ليهم نحنا مبرمجين ونفتش عن مصمم قعدو يضحكو وقال هم برضو بفتشو قام

Ahmed Amir

قال انا مصمم وعرضنا عليهو انو ينضم لينا ووافق طوالي بدون تردد وهو اصلا ما بيعرفنا طبعا اللحظه ديك نحن ما عارفين الفريق بتكون من كم المهم كان الزمن جرا وبعد فتره بسيطة تم الاعلان عن ال

Theme

حق ال

Game Jam

فالناس قعدت اشان نعرف الحاصل شنو والمقصود شنو بس ال

Theme

واتعرض علي البروجكتر حرف حرف يلا الثيم طلع

“Upside Down”

وانو المسابقة بتدور حول ال

Theme

دا وحتتبني عليهو الالعاب والبطلع من الثيم دا بيعتبر خاسر والتحدي الكبيرمتمثل في إنشاء لعبة تعمل بشكل كامل وقابل للعب في 48 ساعة بالضبط .. اي فريق فينا يفترض يجيب فكرة سمحه بتنطبق عليها الكلمتين ديل وانت وابداعك وتفسيرك لي الجملة لانو بعدين في تصنيف حيتقيم عليهو ال

Jam

وبي كدا الناس بدت تفكر لي مدة ساعتين وقدمو الافكار في ورق واتلصقت علي البورد الساعتين ديل عدو بي سرعه خلاص اشان اي زول عايز يجيب فكره تكون درعة لكن برضو الفرق بتعاين لي امكانياتا طبعا فانا متاكد ماف فريق ما جاتو اقل من 3 افكار وفي النهاية رسو علي فكره واحدة ونحنا منهم كنا …

كانت مجازفات شديدة بعداك من كل فريق طلع ممثل يتكلم عن الفكرة ويعرض اذا هو محتاج مصمم ولا مبرمج اشان فريقم اذا ما مكتمل يكتمل او اذا في زول شاف فكرة فريق تاني سمحه يقوم يخلي فريقو الاول وينضم لي الفكرة الاحلي وبي كدا المسابقة بدت في تمام الساعة الرابعة مساءً يوم الخميس واي زول قعد في جهازو وبدا ال

Jamming

و ال

Countdown

حق ال 48 ساعة بدا ينقص

طبعا الجو وال

Atmosphere

اللحظة ديك عجيب وما بتوصف اخر متعه وضحك ما متذكر كنا بنضحك في شنو زاتو

والناس الجايبه اجهزتم ال

PC

المعدلة وناس ال

mac

والناس الشايله شنط بي بطاتينها والفرش والمعجون وجاهزيين بي كلو لي المبيت والعجب كمان منظمين الافنت عزونا ليك بي الاكل داااك والبارد والشاي والكيك وال

Snacks

والباسطه والفواكه مع كل وجبة لا وكمان لو عايز ذيادة خش علي البوفي تشيل وتعال هاك النت دا كان فاتحين لينا شبكه السرعه بتاعتا 3 ميقا في الثانيه ما ميغا بت ميغا بايت .. دا كلو كوم والمنظر بتاع النيل من اخر طابق في برج الاتصالات كوم واتخيلو انو في نفس اليوم دا كان صبت مطرة بليل مع صباحية الجمعة والناس مساهرة وجاره لي الصباح اشان بتبرمج وتصمم وعايزة تكون الفريق الاول وبتبادلو الورديات بكون في واحد قاعد والتاني يمشي ينوم ويجي البعدو وهكذا .. كان في فرق مكونة من 5 انفار وفرق من 6 وفرق من نفرين والسمح كمان البنات ظاهرين في افنت بتاع قيمينق وبرمجه ومشاركين في فرق سبحان الله الحاجه الوحيدة الما كنت بتوقعها منهم وابدعو كمان

Minas IdamShaza Alarbi

.. كان مسموح ليهم يقعدو لي الساعه 8 مساء ويجو الصباح الساعه 6 يواصلو مع انو ما قابلته وحدة بتبرمج كلهم مصممات احتمال كان في واحدة والله اعلم

والقوية

Shaikh Diya

قبضوهو ليك نايم وصوروه ونشروهو ليك في الصفحه الرسمية اول صورة بعد كم يوم من انتهاء الافنت قعدتا اضحك فيهو ضحك وشيرتا ليهو الصورة .. قلتا ليهو قبضوك كان تدسا كويس

اي تيم اثناء الحدث لاقتو مصاعب في الناس الما بتعرف تشتغل بي

unity

وشافو بديل تاني مثلاً انو يشتغلو بي محرك العاب تاني او يخلو المحركات مره واحده ويمشو لي برمجة تطبيقات الاندرويد وفي الغيرو في فكرتم الاولى 360 درجة وفي الحسنو من الفكرة ذيادة لانو لقو روحم ماشين كويس ومتقدمين والكويس والحمدلله النت قاعد يعني لو غلبتك شي ممكن تسال وتعرف المشكله حلها شنو في قوقل انا غايتو عن نفسي نزلتا تتوريلات كتيرة قريب ال 17 قيقا وبديت احضر واشوف الحاجه الانا عاوزا شنو وبطبقا

صاح ما كان ممكن تسال زول من الحكام او المنظمين اذا غلبتك حاجه لكن المتسابقين كان ممكن يستفسرو من بعض ويقدمو مساعدات علي حسب معرفتم لحدي ما جات اخر ساعات من ال 48 الساعة المرة بي سرعه شديدة ونحن ما حاسين بيها والناس متنشنه تنشنه وفي التعبانين ومشو رقدو اشان يرتاحو وفي الرجعو البيت اشان يستحمو ويجو نظيفين

.. وورونا انو ممكن نعزم الناس اشان يجو يحضرو اليوم الختامي انا قدمتا دعوة في الواتس لكن ماف زول عبرني وجاني البرج ههههه بكونو قالو دا مالو دا العاب شنو عليك الله .. المهم لحدي ما جا الزمن كان يفترض كل الناس تطلع نسخه من اللعبه في فلاش او تسلم جهاز فيهو اللعبه لي الاستقبال والما بسلم بيستبعد من المسابقة نحنا سلمنا اخر ناس وخلاص فاضل 5 دقائق ههههههه كنا بنحاول نربط كم حاجه كدا ..

بعد الزمن انتهي وكل الناس سلمت الحمدلله ماف زول ما سلم طلبو مننا نعرض العابنا علي لجنة التحكيم وما شاء الله غايتو الالعاب الطلعت في ال 48 ساعه دي تخلع الزول زاتو لمن تشوف كمية الابداع الفيها والافكار حقتها والتعب الاتعمل فيها وانو عاملنها مبرمجين ومصممين سودانيين ما اتقابلو قبل كدا في حياتهم ههههه والحالة نحا قبل ال48 ساعه دي كنا ما عارفين نعمل شنو زاتو وانو مستحيل نعمل لعبه ملعوبه في الفتره دي

غايتو انا صورتا ال

presentations

كلهم فيديو لحدي ما تلفوني اتملا وقطع في الفريق السادس وفي 3 فرق ما صورتها اتنين منهم فازو بي تصنيفات من تصنيفات المسابقة الاربعة خسارة ما قدرتا اصورهم كل الالعاب كانت متبعه ال

Theme

القلتة ليكم في البداية

في ناس فسرو ال

Upside Down

علي انو يعكسو الفوق تحت والتحت فوق وفي ناس قلبو الشر خير والخير شر وفي ناس عكسو خيارات اللعبة بدل تختار الخيار الصحيح حتختار الخيار الخطاء وفي ناس عكسو الجازبية والعكسو قوانين الطبيعة غايتو افكار كلها سمحه ولذيذة نحنا حقتنا عكسنا فيها دور اللاعب لمن يعمل حاجه هو ما مفروض يعملا اي حاجه بتتعكس ليهو حتي الاتجاهات البمشي عليها .. ممكن احكي ليكم عنها بي التفصيل لمن نطلع ليكم نسخه في قوقل بلاي

لمن انتهت العروض طلبو من الفرق كلها تعرض اللعبه علي الجمهور في حته مخصصه لي اللعب لحدي ما يطلع قرار اللجنه بتاعت التحكيم اخدنا اجهزتنا مشينا عرضنا اللعبه ولعبنا العاب الفرق التانيه واستمتعنا كتير لحدي ما جات لحظة التتويج بالجائزة الاولي .. في اللحظة ديك نحنا كلنا راضين من الايام القضيناها ومستمتعين وكلنا عارفين روحنا حتي لو ما فزنا بي الجائزة نحنا فايزين بي حاجات تانيه كتيره

already

وكل الالعاب الاتعملت بتستحق الفوز ومتاكد اللجنة بتكون واجهتا مشكلة في اختيار الفائز من كثرة الخيارات الموجودة

واعلنو التصنيفات الاربعة حقت المسابقة والفائزين علي النحو التالي:

Best Game

دي حقت احسن لعبة وعليها جائزة 30 الف جنيه لي فريق واحد اسمو

Switch

ما شاء الله ابدعو الفريق بتاعم مكون من نفرين والاتنين مبرمجين ما كان معاهم مصمم لعبتم كانت

In a whole another level

من شفناها بعد الناس كملت عرضها عرفنا انهم من المرشحين للجائزة

والتصنيفات الباقية تصنيفات تشريفية من غير جائزة مالية

Best Playable Game (Game Play)

ودي فزنا بيها نحنا بي لعبتنا

CellsAtWork

انجاااااز ياخ ههههه تسلمو تسلمو اصلا ما محتاج تصفيق خخخخ

Best Game Idea (Story)

فازو بيها تيم لعبة

Sure

ما شاء الله عليهم طلعو عن المالوف شوية وفكرتم كانت غير وبستحقو التصنيف

Best Game Design (Art)

فازو بيها تيم لعبة

Reverse Entropy

لانو تصاميم صراحه ابداع كلها عاملنها هم

وادو اي زول شارك مننا شهادة بتاعت مشاركة وما شاء الله ودا كلو مجان اشان تعرف انو في ناس لسه فيها خير وبتحب تفيد الناس

الفرق المشاركة كان مجموعا 9 فرق ممكن اذكر ليكم اسماء العابم من غير شرح للفكرة لانو احتمال يكون فيها ملكية فكرية وعايزين يسجلوها ما عايز اخرب عليهم

1- Switch

2- Sure ?

3- The Up Down Forest

4- Shadow Run

5- Super Zoal

6- Wicked

7- Reverse Entropy

8- Cells At Work

9- Space Prison (Scofield)

ياخ كان ايام حلوة والله وواحدة من افضل التجارب اشتغلنا كتير واتعلمنا وضحكنا في 48 ساعة وقابلتا ناس رائعين بمعني الكلمة وبلدنا دي بي كل الحاصل فيها لسه فيها امل وناس مبدعين بس يبق التحدي في منو البيدعم الشباب وبيهتما بيهم ويا ريت تنعاد الايام دي اتعلمنا كمية من الحاجات في وقت وجيز جدا بفضل الافنت دا والاصلاً ما كنا عارفين عنو حاجه لمن قدمنا فيهو وقبل كدا شاركتا في مسابقات بس دي كانت افضلها ومتعه اكتر واظن كل الناس الشاركة انبسطت بي نفس القدر وحتواصل في المجال دا لي قدام ونشوف العاب سودانيه بتحكي الكتير عن واقعنا وحتي ترفع من اقتصاد البلد اذا امكن

الايام الفاتت دي كنت راجي باقي الصور تنزل علي الصفحة الرسمية لي الحدث بس شايفم اتاخرو لي قدام بنشر ليكم صور اكتر وتابعو الصفحة للحدث القادم

Khartoum Game Jam

نشكر مؤسسة جوتا الثقافية الالمانية

Goethe-Institut Sudan

Mr. Jonas Zimmerو

من معمل كلوني للالعاب

ومجتمع الخرطوم للالعاب

Khartoum Game Collective

وشركة ام تي ان

MTN Sudan

و مجتمع الانترنت السوداني

Sudan Internet Society

علي تنظيم هذا الحدث الرائع والقادم اكيد احلي بي كتير

عمرو عبدالكريم حسن العوض

17/8/2018

en_USEnglish
arArabic en_USEnglish